IMG_0809

November 23, 2015

Արցախի Հանրապետութեան Վարչապետը Կ՛այցելէ Ազգային Ֆերահեան Վարժարան

«Հողը քո այս մի բուռ
Դու դարձրել ես եդեմ,
Լոյսով ճամբադ հարթել,
Ի ցաւ քո թշնամու՝
Կառուցելով ապրել,
Ապրելով ես յաղթել»

Այս բանաստեղծական տողերով, Ազգային Ֆերահեան վարժարանի 12րդ կարգէն հանդիսավար Վիգէն Քէչէճեան բացումը կատարեց Արցախի Հանրապետութեան վարչապետ Արայիկ Յարութիւնեանի վարժարան կատարած այցելութեան առթիւ հանդիսութեան։
Միջոցառումը, որ տեղի ունեցաւ Նոյեմբեր 23, 2015ին, վարժարանի «Աւետիսեան» սրահին մէջ, կազմակերպուած էր վարժարանի Հայերէն բաժանմունքին կողմէ: Ձեռնարկին ներկայ էին Սրբոց Նահատակաց եկեղեցւոյ հոգեւոր հովիւ Ռազմիկ քհնյ. Խաչատուրեան, եկեղեցւոյ հոգաբարձութեան եւ Հայաստան Համահայկական հիմնադրամի ներկայացուցիչներ, դպրոցի ուսումնական մարմինի, շրջանի ՀՅԴ «Ռոստոմ» եւ «Արշաւիր Շիրակեան» կոմիտէութեանց եւ ՀՕՄի անդամներ, դպրոցի տնօրէնութիւն, ուսուցչական կազմ, ծնողք եւ խանդավառ աշակերտներ:
Հանդիսավարը Արցախի հակիրճ պատմականը տալէն ետք ըսաւ, որ Արցախի օգնութեան զանգը կրկին կը հնչէ, եւ կոչ ուղղեց բոլորին՝ ամենայն խանդավառութեամբ, առատաձեռնութեամբ եւ նուիրումով մասնակցելու Հայաստան Համահայկական հիմնադրամին կազմակերպած թելեթոնին, իրենց լումաները տրամադրելով այս տարուան ծրագիրին:
Վարժարանի տնօրէն Ժան Գոսագեան բարի գալուստ մաղթեց վարչապետին եւ ուրախութիւն յայտնեց վարչապետին Ամերիկայի առաջին հայկական դպրոց այցելութեան առթիւ: Ան նշեց, որ այս տարի դպրոցը արդէն իսկ 52 տարեկան է եւ ունի աւելի քան 2000 շրջանաւարտներ, որոնց մեծամասնութիւնը վերադառնալով՝ կը ծառայէ հայ գաղութին եւ հայրենիքին: Տնօրէնը աւելցուց, թէ վարժարանը ազգային ոգիով կը կրթէ իր աշակերտները, որոնք մեծ հպարտութեամբ, ամէն տարի կը մասնակցին Համահայկական հիմնադրամի թելեթոնին, որ կը ծառայէ Արցախի կարիքներուն, æաւախքի զարգացման, Հայ Դատի աշխատանքներուն եւ հայրենիքի հզօրացման համար կազմակերպուած նախաձեռնութիւններուն: Ապա տնօրէն Գոսագեան շնորհակալութիւն յայտնեց շրջանի ՀՅԴ կոմիտէութեանց, ՀՕՄին, ՀՄԸՄին եւ Համազգայինին, որոնք ներկայ են ձեռնարկին եւ միշտ նեցուկ կանգնած են վարժարանին տարած բոլոր աշխատանքներուն:
Ընթացքին տեղի ունեցաւ տեսաերիզի ցուցադրութիւն՝ պատրաստուած Հայաստան Համահայկական հիմնադրամին կողմէ. անով կը ցուցադրուէր զոհուած ազատամարտիկներու բազմազաւակ ընտանիքներու բնակութեան խղճալի պայմանները, իսկ անկէ ետք խօսք առաւ վարչապետ Յարութիւնեան:
Ան հակիրճ կերպով պատմեց Արցախի իրավիճակին մասին եւ նշեց, թէ Արցախի կառավարութիւնը օրէ օր աշխատանք կը տանի զարգացնելու եւ աւելի եւս հզօրացնելու Հանրապետութիւնը: Ան աւելցուց ըսելով, որ իր Ամերիկա գալուն նպատակներէն մէկն է՝ աւելի՛ եւս ամռացնել Հայրենիք-Արցախ-Սփիւռք կապերը: Վարչապետը բացատրեց, թէ ներկայիս պայմաններ չունին բնակչութեան թիւը բազմացնելու՝ նշելով, որ Արցախի մէջ կան ընտանիքներ, որոնք հակառակ բազմազաւակ ըլլալնուն՝ պատրաստ են ընտանիքի անդամներու թիւը աճեցնելու, սակայն անոնց բնակարանային պայմանները չեն ներեր: Ճիշդ այդ պատճառով է, որ անոնք կապուած են Հայաստան Համահայկական հիմնադրամին, որպէսզի այս տարուան թելեթոնին գլխաւոր նպատակը ըլլայ բնակարաններ ապահովել հինգ կամ աւելի երեխայ ունեցող բազմազաւակ ընտանիքներուն:
Նաեւ առիթ տրուեցաւ աշակերտներուն, որպէսզի հարցումներ ուղղեն հիւր վարչապետին: Շուրջ 25 աշակերտներ իրենց զանազան բնոյթի հարցումները ուղղեցին վարչապետին, որ իր կարգին պատասխանեց անոնց՝ մեծ համբերութեամբ եւ սիրալիր ոճով:
Ձեռնարկի աւարտին տեղի ունեցաւ գեղարուեստական հակիրճ յայտագիր մը: 10րդ կարգի աշակերտները խմբովին երգեցին Գուսան Տոտիկի (Աշոտ Բէգոյեան) հեղինակած «Անօրէն թուրքն է տիրել Մայր հողին» երգը, ապա՝ «Գետաշէն»ը: Երգողներու խումբին՝ Հայաստանի եւ Լեռնային Արցախի դրօշներով միացան 6րդ եւ 7րդ դասարանի աշակերտները, ապա անոնց միացաւ նաեւ ամբողջ աշակերտութիւնը՝ խանդավառ մթնոլորտ մը ստեղծելով սրահէն ներս:
Յիշեցնենք, որ վարչապետ Յարութիւնեան Ամերիկա կը գտնուի Նոյեմբեր 26ին տեղի ունենալիք Հայաստան Համահայկական հիմնադրամի՝ «Մեր Տունը» խորագրեալ թելեթոնին առթիւ, որուն գլխաւոր նպատակն է բնակարաններ ապահովել հինգ կամ աւելի երեխայ ունեցող Արցախցի բազմազաւակ ընտանիքներուն:
Ազգային Ֆերահեան վարժարանի տնօրէնութեան եւ անձնակազմին կոչն է՝ ամենայն խանդավառութեամբ, առատաձեռնութեամբ եւ նուիրումով մասնակցիլ թելեթոնին՝ մեր լումաները տրամադրելով այս տարուան ծրագիրին:
Արցախը հզօր է ու անառիկ՝ իր հերոսական ժողովուրդով եւ մարտունակ բանակով, սակայն Արցախի ժողովուրդը կարիքը ունի մեր աջակցութեան եւ քաջալերանքին:

 

IMG_0756 IMG_0757 IMG_0765 IMG_0768 IMG_0771 IMG_0772 IMG_0772-2 IMG_0773 IMG_0775 IMG_0777 IMG_0778 IMG_0779 IMG_0781 IMG_0783 IMG_0784 IMG_0785 IMG_0786 IMG_0787 IMG_0788 IMG_0789 IMG_0791 IMG_0792 IMG_0793 IMG_0794 IMG_0799 IMG_0800-2 IMG_0800-3 IMG_0801 IMG_0803 IMG_0804 IMG_0804-2 IMG_0805 IMG_0806 IMG_0807 IMG_0809 IMG_0810 IMG_0811 IMG_0811-2 IMG_0812 IMG_0813 IMG_0814 IMG_0815 IMG_0816 IMG_0818IMG_0754