IMG_7381 (800x600)

Հանդիպում՝ Փրոֆ.  Աշոտ Մելքոնեանի Հետ

Երկուշաբթի, Մարտ 02, 2015ին, Ազգային Ֆերահեան Վարժարանի 9րդ, 11րդ եւ 12րդ դասարանի աշակերտները հաւաքուելով վարժարանի «Տիգրանեան» սրահին մէջ, հանդիպում մը ունեցան, Հայ Օգնութեան Միութեան «Ջաւախք» Հիմնադրամի յանձնախումբի յատուկ հրաւէրով Հայաստանէն հիւր ժամանած՝ Հայոց պատմութեան հիմնարկի տնօրէն՝ Փրոֆ. Աշոտ Մելքոնեանի հետ:

Վարժարանի տնօրէն Ժան Գոսագեան հակիրճ ձեւով ներկայացուց օրուայ հիւրին, որմէ ետք, խօսք առաւ 12րդ դասարանէն՝ Ալիք Մնացականեան: Ան, վարժարանի պատմականը տալէ ետք, հրաւիրեց 11րդ դասարանէն Դալար Մինասեանին որպէսզի կարդայ օրուայ հիւրին կենսագրութիւնը:

 

 

IMG_7373 (1024x768) IMG_7375 (768x1024) IMG_7377 (800x600)IMG_7379 (1024x768)IMG_7382 (1024x768)

 

 

 

 

 

 

Մօտաւորապէս 45 վայրկեան երկարող այս հանդիպումին, Փրոֆ. Աշոտ Մելքոնեան աշակերտութեան խօսեցաւ Հայկական արմատներու, արեւմտահայերէնի եւ արեւելահայերէնի տարբերութիւններու, հայոց ցեղասպանութեան մասին, եւ ապա Ջաւախքի պատմականը տալով, խօսեցաւ Ջաւախքահայութեան եւ անոնց անմիջական կարիքներւն մասին, յանձնարարելով միշտ յիշել, որ Հայաստանի Հանրապետութենէն դուրս, կայ քանի մը հայրենիք եւս, կայ Արցախի Հանրապետութիւնը որը հերոսի պէս կեցած է ութը միլիոն բնակչութիւն ունեցող Ազրպէյճանի դէմ որ մինչ օրս չէ կրցած հայ զինուորին ծունկի բերել, կայ Ջաւախք աշխարհը իր 150,000 հայ բնակիչներով եւ իր 105 հայկական գիւղերով, իր պատմութիւնով, ինչպէս նաեւ, յանձնարարեց գիտակցիլ, որ ամէն մէկ հայ, տէրն է աշխարհի վրայ ապրող ամէն մէկ հայուն, տէրն է թուրքերու կողմէ բռնագրաւուած հայկական բոլոր հողերուն, եւ ապա խօսքը շարունակեց ըսելով «մնացէք պահանջատէր եւ մնացէք կառչած ձեր հողին, ազգին, եւ մէկ ու միացեալ Հայաստանի տեսլականին, իր Ջաւախքով, Նախիջեւանով եւ Արցախով»:

Փրոֆ. Աշոտ Մելքոնեանի խրախուսիչ խօսքերը արժանացան աշակերտներուն բուռն ծափահարութեան: Որմէ ետք, եղան ոգեւորիչ արտայայտութիւններ եւ ապա հետաքրքրական հարցումներ, բոլորին ալ համբերութեամբ պատասխանեց օրուայ հիւրը:

«Ջաւախք» Հիմնադրամի յանձնախումբի անդամներէն՝ Յարութ Մատէնեան, նախ շնորհակալութիւն յայտնեց բոլոր աշակերտներուն որոնք տարիներու ընթացքին մասնակցելով «Ջաւախք» հիմնադրամի յանձնախումբի կազմակերպած հանգանակութեան աշխատանքներուն եւ յոյս յայտնեց որ այս տարի եւս կարելի պիտի ըլլար Ազգային Ֆերահեան Վարժարանի աշակերտութեան մասնակցութիւնը Ջաւախքահայութեան համար տարուած, լեզուի եւ մշակոյթի պահպանման աշխատանքներուն:

Յիշեցնենք որ, Փրոֆ. Աշոտ Մելքոնեան, Մարտ 1, 2015ին գլխաւոր պատգամաբերն էր «Ջաւախք» Հիմնադրամի յանձնախումբին կազմակերպած տարեկան հանգանակային ձեռնարկին: Իսկ Մարտ 6ին, հրապարակային դասախօսութիւն մը պիտի ունենայ, Գլենտէյլի հանրային գրադարանին մէջ, սիրով հրաւիրուած են բոլորը:

 

Սալբի Թէքկէլեան

 

IMG_7384 (1024x768) IMG_7383 (1024x768) IMG_7385 (1024x768) IMG_7387 (1024x768) IMG_7388 (1024x768) IMG_7390

 

 

 

 

 

IMG_7389 (1024x768) IMG_7392