IMG_1518 (800x533)

2016-2017 ուսումնական տարեշրջանի վերամուտ է եւ արդէն իսկ վերաբացին իրենց դռները ազգային վարժարանները, որոնց շարքին՝ Ազգային Ֆերահեան վարժարանը:

Օգոստոս 15, 2016ի առաւօտուն, Սփիւռքի մէջ ծնած երրորդ եւ չորրորդ սերունդ հանդիսացող հայ աշակերտները, երկու ամսուան երկար արձակուրդէն ետք, ուրախութեամբ  վերադարձած էին իրենց սիրելի վարժարանը: Վարժարան մը, որ հինգ տասնամեակներէ ի վեր, հայ աշակերտները կը զարգացնէ հոգիով ու միտքով, կը սորվեցնէ հայոց լեզուն, պատմութիւնը, գրականութիւնը, Հայ Դատը, մշակոյթն ու կրօնը:

«Պէտք է հպարտ զգանք, որ մենք առաջին ազգն ենք, որ ընդունեցինք քրիստոնէութիւնը», յայտարարեց Ազգային Ֆերահեան վարժարանի նորանշանակ տնօրէնուհի Սօսի Շանլեանը, վարժարանի 2016-2017 ուսումնական տարեշրջանի պաշտօնական բացման հանդիսութեան առիթով, որուն ներկայ էին թեմի առաջնորդ Մուշեղ արք. Մարտիրոսեան, Սրբոց Նահատակաց եկեղեցւոյ հոգեւոր հովիւ Ռազմիկ քհնյ. Խաչատուրեան, ինչպէս նաեւ ազգային դպրոցներու Խնամակալ մարմինի, վարժարանի Ուսումնական մարմինի, շրջանի ՀՅԴ «Ռոստոմ» եւ «Արշաւիր Շիրակեան» կոմիտէութեանց եւ ՀՕՄի ներկայացուցիչներ, դպրոցի տնօրէնութիւն, ուսուցչական կազմ, ծնողներ եւ խանդավառ աշակերտներ:

Սրբոց Նահատակաց եկեղեցւոյ հոգեւոր հովիւ Ռազմիկ քհնյ. Խաչատուրեանի աղօթքով բացումը կատարուեցաւ վերամուտի պաշտօնական հանդիսութեան, որմէ ետք աւարտականի աշակերտները կատարեցին հայկական եւ ամերիկեան ուխտերը:

Երկրորդական բաժինի կրթական խորհրդատու Լիզ Յովհաննիսեան, բարի գալուստի մաղթանքներէն ետք, ներկաները հրաւիրեց միասնաբար ողջունելու վարժարանի նորանշանակ տնօրէնուհին, աշխատակազմը եւ ուսուցիչ-ուսուցչուհիները:

Ապա խօսք առաւ վարժարանի տնօրէնուհի Սօսի Շանլեան: Ան, իր կարգին բարի գալուստ մաղթելէ ետք, յաջող եւ արդիւնաբեր տարի մը ըլլալու յոյսով յայտնեց,  թէ այս տարի վարժարանին նպատակը պիտի ըլլայ աւելի եւս զարգացնել աշակերտներուն գիտելիքները, ուղղել զիրենք դէպի պատասխանատու ճանապարհներ եւ օգնել, որպէսզի աւելի հասուն եւ առողջ կերպով վերլուծեն եւ ընկալեն իրենց մատուցուածը: Շարունակելով իր խօսքը, ան յայտնեց, որ ինք կ՛ուզէ Ազգային Ֆերահեան վարժարանը ըլլայ ամենալաւ վարժարանը, ոչ թէ միայն մեզի համար, այլ՝ ամբողջ Սան Ֆերնանտօ հովիտի, եւ ինչու չէ, նաեւ Լոս Անճելոսի ամբողջ տարածքին համար: Ապա, ուղղելով իր խօսքը աշակերտներուն, ան աւելցուց, թէ իբրեւ նոր տնօրէնուհի, ինք ունի երկու ակնկալութիւններ. առաջին՝ յարգանքն է, որ փոխադարձ պէտք է ըլլայ, եւ թէ յարգանք բառը կը պարունակէ օրինակելի, տիպար, եւ քրիստոնեայ աշակերտ եւ մարդ ըլլալու բոլոր տառերը, իսկ երկրորդ՝ վարժարանին կողմէ նշանակուած օրէնքներուն հետեւումը:

Տնօրէնուհիին խօսքէն ետք ներկաները լսեցին Արեւմտեան թեմի առաջնորդ Մուշեղ արք. Մարտիրոսեանի պատգամը: Սրբազան հայրը, վերամուտի ուրախ առիթով, իր հայրական օրհնութիւնն ու աղօթքը ուղղելէ ետք, իր կարգին բարի գալուստ մաղթեց վարժարանի նորանշանակ տնօրէնուհիին եւ գնահատեց հայ դպրոցի առաքելութիւնը, ինչպէս նաեւ հայ աշակերտին եւ ուսուցիչին իւրայատուկ տեղն ու դիրքը մեր ազգային կեանքէն ներս:

Վերջաւորութեան, հայրական ջերմ աղօթքներով ան օրհնեց դպրոցի վերամուտը:

Յայտագիրի աւարտին, միջնակարգ եւ երկրորդական դասարանի աշակերտները իրենց դաստիարակներուն ընկերակցութեամբ ուղղուեցան իրենց դասարանները:

 

(Թղթակցութիւնը՝

Վարժարանէն)

 

IMG_1480 (800x533) IMG_1481 (800x533) IMG_1482 (800x533) IMG_1483 (800x533) IMG_1484 (800x533) IMG_1485 (800x533) IMG_1487 (800x533) IMG_1489 (800x533) IMG_1490 (800x533) IMG_1491 (800x533) IMG_1492 (800x533) IMG_1493 (800x533) IMG_1494 (800x533) IMG_1495 (800x533) IMG_1496 (800x533) IMG_1499 (800x533) IMG_1500 (800x533) IMG_1501 (800x644) IMG_1502 (800x533) IMG_1505 (800x533) IMG_1508 (800x533) IMG_1509 (800x533) IMG_1510 (800x533) IMG_1514 (800x533) IMG_1516 (800x533) IMG_1518 (800x533) IMG_1520 (800x533) IMG_1525 (800x533) IMG_1528 (800x533) IMG_1531 (800x533) IMG_1534 (800x533) IMG_1535 (800x533) IMG_1537 (800x533)