Ազգային Ֆերահեան Վարժարանը Բացաւ Իր Դռները 2015-2016 Տարեշրջանին

ՍԱԼԲԻ ԹԷՔԿԷԼԵԱՆ

«100 տարի առաջ օսմանցի թուրքերը ուզեցին ոչնչացնել մեր ազգը: Այսօր՝ 100 տարի ետք, աշխարհի վրայ կ՛ապրին 8-10 միլիոն հայեր, որոնցմէ 620ը Ազգային Ֆերահեան վարժարան կը յաճախէ», յայտարարեց Ազգային Ֆերահեան վարժարանի տնօրէն Ժան Գոսագեան, Երկուշաբթի, Օգոստոս 17, 2015ի առաւօտեան ժամը 8ին, վարժարանի 2015-2016 ուսումնական տարեշրջանի պաշտօնական բացման հանդիսութեան, որուն ներկայ էին թեմի առաջնորդ Մուշեղ արք. Մարտիրոսեան, Սրբոց Նահատակաց եկեղեցւոյ հոգեւոր հովիւ Ռազմիկ քհնյ. Խաչատուրեան, ինչպէս նաեւ դպրոցներու Խնամակալ մարմինի, եկեղեցւոյ հոգաբարձութեան, դպրոցի Ուսումնական մարմինի, շրջանի ՀՅԴ «Ռոստոմ» եւ «Արշաւիր Շիրակեան» կոմիտէութեանց եւ ՀՕՄի ներկայացուցիչներ, դպրոցի տնօրէնութիւն, ուսուցչական կազմ, ծնողներ, աշխոյժ ու խանդավառ աշակերտներ:

Հանդիսութեան բացումը կատարեց «Ֆերահեան»ի միջնակարգ բաժինի կրթական խորհրդատու Լիզ Յովհաննիսեան, որ բեմ հրաւիրեց Ռազմիկ քհնյ. Խաչատուրեանը, որպէսզի կատարէ բացման աղօթքը. ապա աւարտականի աշակերտներ կատարեցին Հայկական եւ Ամերիկեան ուխտերը:

Բարի գալուստի խօսքով բեմ բարձրացաւ վարժարանի տնօրէն Ժան Գոսագեան: Խօսելով վարժարանի բարձր մակարդակի ուսման մասին՝ ան ըսաւ. «Վարժարանի կարեւոր նպատակներէն է բարձր եւ լաւ ուսում տալը, եւ շնորհիւ բարձր մակարդակի ուսման՝ աւարտական տարիներու աշակերտներ կրցած են համալսարաններու մէջ իրենց ուսումը շարունակելով յաջողութիւններ գտնել, ինչ որ մեծ յաղթանակ է Ազգային Ֆերահեան վարժարանին համար: Իսկ երկրորդ մեծագոյն յաջողութիւնը հայեցի դաստիարակութեան ջամբումն է»:

Շարունակելով իր խօսքը՝ տնօրէն Գոսագեան ըսաւ, որ վարժարանին համար կարեւոր է նաեւ, որ հայ աշակերտը վարժարանէն ներս զգայ հանգիստ եւ ուրախ ու դպրոցը համարէ իր երկրորդ տունը:

Ապա, տնօրէնը բեմ հրաւիրեց թեմի առաջնորդ Մուշեղ արք. Մարտիրոսեանը, որպէսզի փոխանցէ իր հայրական պատգամն ու Աստուծոյ օրհնութիւնը: Սրբազան հայրը նախ փառք տուաւ Աստուծոյ, որ ամառնային անփորձ ու անվտանգ արձակուրդէն ետք անգամ մը եւս առիթ կ՛ընծայէ վերաբանալու վարժարաններու դռները: Ապա, անդրադառնալով Ցեղասպանութեան 100ամեակին՝ ան յիշեցուց, որ անցեալ Ապրիլին, հայ եկեղեցին սրբադասեց Ցեղասպանութեան զոհ գացած մեր նահատակները, որոնք դարձան մեր պաշտպաններն ու բարեխօսները: Վերջաւորութեան, հայրական ջերմ աղօթքներով ան օրհնեց դպրոցի վերամուտը:

Յայտագիրի աւարտին, միջնակարգի եւ երկրորդականի աշակերտները իրենց դաստիարակներուն ընկերակցութեամբ ուղղուեցան իրենց դասարանները:

Առաջնորդին եւ տնօրէնին առաջնորդութեամբ, Ուսումնական մարմինի անդամներն ու հիւրերը Էնսինոյի համալիրէն ուղղուեցան Նորթ Հիլզի համալիր, ուր Սրբոց Նահատակաց Մարի Գապայեան նախակրթարանի աշակերտները՝ իրենց ուսուցիչներուն հետ, կը սպասէին նոր տարեշրջանի բացման արարողութեան: Նախակրթարանի խորհրդատու Ատրինէ Արոյեան կատարեց հանդիսութեան բացումը: Տնօրէնն ու առաջնորդ սրբազանը դարձեալ փոխանցեցին իրենց պատգամները ընդհանուր գիծերու մէջ, այս անգամ՝ նախակրթարանի աշակերտներուն եւ ներկայ ծնողներուն: Այսպէս, Ազգ. Ֆերահեան երկրորդական վարժարանը եւ Գապայեան նախակրթարանը իրենց դռները բացին 52 տարուան սեմին՝ Սփիւռքի մէջ ծնած երրորդ եւ չորորդ սերունդ հանդիսացող հայ աշակերտներուն առջեւ:

 

Middle & High School (August 17, 2015)

IMG_9692 IMG_9697 IMG_9696IMG_9695IMG_9699IMG_9706IMG_9698IMG_9702IMG_9708IMG_9710IMG_9707IMG_9705IMG_9713

 

 

 

 

 

 

 

 

 

 

 

 

 

 

 

 

 


 

Cabayan Elementary School

8172015-7

 

 

 

 

 

 

 

 

 

 

 

 

 

 

8172015-1 8172015-2 8172015-3 8172015-4 8172015-5 8172015-6