IMG_5217

Friday October 31, 2014

Մշակոյթի Օր Ազգային «Ֆերահեան» Վարժարանէն Ներս

Ազգային «Ֆերահեան» վարժարանի հայերէն լեզուի ուսուցչուհիներու հաւաքական եւ հոգատար աշխատանքով, Ուրբաթ, Հոկտեմբեր 31ին, վարժարանին կողմէ աւանդաբար նշուեցաւ հայ մշակոյթի նուիրուած օրը: Որու ընթացքին, ճոխ յայտագիրով հանդէս եկան վարժարանի տարբեր դասարանի աշակերտներ, տօնախմբելու, ազգային եւ կրօնական մեծ արժէք ունեցող եւ կարեւորութիւն ներկայացնող հայ ժողովուրդի մեծագոյն տօներէն, «Թարգմանչաց Տօն»ը:

Հանդիսավարն էր՝ 12րդ կարգէն Լիա Քէշիշեան: Ան՝ իր բացման խօսքին մէջ, Թարգմանչաց Տօնի կարեւորութեան մասին պատմական ակնարկով մը անդրադառնալէ եւ Հայ մշակոյթի տիտանները հպարտութեամբ յիշելէ ետք, հայ մշակոյթին գուրգուրանքով մօտենալն ու անոր պահպանումը, հայ աշակերտութեան պարտաւորութիւնը համարեց, որմէ ետք, 12րդ կարգէն Դրօ Աշճեան, փառաբանելով հայ թարգմանիչներու յիշատակը, յայտագիրի բացման խօսքը փոխանցեց անգլերէնով:

Օրուայ մեծագոյն անակնկալն էր, Արցախի ծնունդ, Հայաստանի Լաւագոյն երգիչներէն՝ Ռազմիկ Ամեանի անակնկալ այցելութիւնը վարժարան: Աշակերտութեան ծափահարութիւններով եւ ուրախութեան բարձր բացականչութիւններով դիմաւորուելէ ետք, ան, հանդէս եկաւ հայկական մի քանի ճոխ երգերով, որուն շուրջպարերով ընկերացան վարժարանի աշակերտները, ստեղծելով աւելի խանդավառ եւ ճոխ մթնոլորտ մը:

Յատկանշական էր լսել  6-րդ դասարանի խումբ մը աշակերտներու կատարողութեամբ Համաստեղի «Հայոգ Ոգին» բանաստեղծութիւնը, որուն յաջորդեց կրկին 6-րդ կարգէն Նարօտ Արիսեանի «Սիրելի Ուսուցիչ» երգը: Ապա՝ 7-րդ կարգէն երկու աշակերտներ արտասանեցին Վահան Թէքէեանի «Տաղ Հայերէն Լեզուի» բանաստեղծութիւնը, որմէ ետք, 6-րդ կարգէն Սամի Շահինեան դաշնակի վրայ նուագեց «Ժողովրդային Պար»ը: Գեղարուեստական յայտագիրը շարունակուեցաւ 8-րդ կարգէն խումբ մը աշակերտներու Գէորգ Էմինի «Այբուբեն Չէ Սա» արտասանութեամբ, որուն յաջորդեց 10-րդ կարգէն խումբ մը աշակերտերու «Թռչէի Մտքով Տուն» Մարտիկի երգով, իսկ «Մայրենի Լեզու»ն արտասանեցին  10-րդ կարգէն խումբ մը աշակերտներ համառօտելով օրուան պատգամն ու հոգիները աւելի եւս զինելով հայու ազգային հպարտ ինքնութեամբ: Մշակոյթի մթնոլորտը առաւել խանդավառեցաւ, երբ պարուսոյց Լիլիա Մարգարեանի ղեկավարութեամբ բեմ բարձրացան 6րդ կարգի աշակերտները՝ որոնք հայկական պարով մը, մշակոյթի օրուայ խանդավառութեան մթնոլորտը հասցուցին իր գագաթնակէտին:

Ապա օրուան հանդիսավարը բեմ հրաւիրեց վարժարանի տնօրէն Ժան Գոսագեանը: Ան՝ շնորհակալութիւն յայտնեց որ դպրոցը արդէն իսկ սկսած է մեծապէս օժանդակել Սուրիոյ հայկական վարժարաններուն, կազմակերպելով յատուկ ձեռնարկներ, հայերէնի ուսուցչուհի՝ Տիկ. Թալին Ճանէցեանի գլխաւորութեամբ, եւ ապա, բոլոր ուսուցիչներուն յանձնարարեց, որ՝ իրենք ալ, վարժարանէն ներս, յատուկ ձեռնարկներ կազմակերպէն որպէսզի աւելի շատ գումարներով օժանդակէն Սուրիահայ վարժարաններուն եւ հայ աշակերտութեան: Իր խօսքի վերջաւորութեան, տնօրէնը անգամ մը եւս շեշտեց հայ մշակոյթի կարեւորութիւնը եւ հայ լեզուի պահպանման անհրաժեշտութիւնը եւ շնորհակալութիւն յայտնեց յայտագիրին մէջ բաժին ունեցող բոլոր աշակերտներուն եւ մշակոյթի օրուան յայտագիրը պատրաստող բոլոր ուսուցիչներուն:

 

IMG_5218 IMG_5221 IMG_5222 IMG_5227 IMG_5228 IMG_5235 IMG_5249 IMG_5253 IMG_5254 IMG_5256 IMG_5261 IMG_5262 IMG_5263 IMG_5267 IMG_5269 IMG_5270 IMG_5275 IMG_5278 IMG_5281 IMG_5286 IMG_5293 IMG_5295 IMG_5297 IMG_5301 IMG_5303 IMG_5305 IMG_5306 IMG_5307 IMG_5308 IMG_5309 IMG_5223 IMG_5245 IMG_5260 IMG_5265 IMG_5291 IMG_5298 IMG_5276