Հ.Յ.Դ. Բիւրոյի Անդամ՝ Արմէն Ռուստամեան Կ’այցելէ Ազգային Ֆերահեան Վարժարան

«Զաւակը ըլլալով այս ազգին, մեծ երախտապարտութեամբ ու հպարտութեամբ, կ’ողջունեմ ազգային հզօր կազմակերպութեան, բարձրագոյն ղեկավար մարմնի, Հ.Յ.Դ. Բիւրոյի անդամ՝ Ընկ. Արմէն Ռուստամեանին»: 11րդ դասարանէն՝ Նարեկ Գույումճեան, Երեքշաբթի, Յունուար 19, 2016ին, այս խօսքերով ողջունեց, Արմէն Ռուստամեանին, որ կ’այցելէր Ազգային Ֆերահեան վարժարան, ծանօթանալու եւ ապա, խօսելու Հայաստանի ներկայ ուսումնական համակարգի, երիտասարդ զօրակոչիկներու իրաւիճակի եւ առհասարակ երիտասարդութեան դիմագրաւած հարցերուն:

Նարեկ Գույումճեան իր բացման խօսքի աւարտին հրաւիրեց վարժարանի տնօրէն՝ Ժան Գոսագեանին, որպէսզի ներկայացնէ օրուայ հիւրը: Ժան Գոսագեան, նախ խօսեցաւ Արմէն Ռուստամեանի շրջանը այցելութեան մասին, ըսելով որ, ան՝ գլխաւոր բանախօսն էր, Դաշնակցութեան 125 ամեակի առիթով կազմակերպուած տօնակատարութեան եւ շրջանին մէջ իր ներկայութեան առիթը օգտագործելով, վարժարանի տնօրէնութիւնը հրաւիրած էր զինքը, որպէսզի այցելէ Ֆերահեան եւ հանդիպի դպրոցի բարձրագոյն դասարաններու աշակերտութեան:

Ապա, Ժան Գոսագեան ներկայացուց Ռուստամեանի քաղաքական կեանքի հակիրճ կենսագրութիւնը, միեւնոյն ժամանակ ներկայացնելով նաեւ Հայաստանի վերանկախացումէն ետք, Դաշնակցութեան անցած դժուար ճանապարհը, յայտնելով թէ՝ Ռուստամեան եւս մօտաւոր երեք տարի բանտարկուած է եւ ազատ արձակուելէ ետք, գործօն ներկայութիւն ունեցած է ընտրուելով Հայաստանի Խորհրդարանի անդամ: Ան տարիներ շարունակ եղած է- Խորհրդարանի Արտաքին Յարաբերութեանց Յանձնաժողովի անդամ եւ 2003-2012 նոյն յանձնաժողովի նախագահ: Ներկայիս, ան անդամ է Դաշնակցութեան ամենաբարձր մարմնի, Հ.Յ.Դ. Բիւրոյին:

Արմէն Ռուստամեանին կ’ընկերակցէր, Արեւմտեան Ամերիկայի Կեդրոնական կոմիտէի անդամ՝ Մարտիկ Կապուտեանը, եւ Հ.Յ.Դ. Ռոստոմ Կոմիտէի ներկայացուցիջներ Մարտիկ Քէօշկէրեան եւ Մուշեղ Յովակիմեանը:

Արմէն Ռուստամեան ջերմ սրտով ողջունելէ ետք բոլորին, ուրախութիւն յայտնեց որ հայրենիքէն հեռու, Ամերիկայի ափերուն կայ հայկական գաղթօջախ, որու միջոցաւ աշակերտութիւնը հայեցի եւ ազգային դաստիարակութիւն կը ստանայ եւ քաջալերեց աշակերտութեան որպէսզի ըլլան լաւատես եւ դառնան հայ մշակոյթի եւ հայ ժառանգութեան պահպաները: Ռուստամեան խօսեցաւ Հայաստանի ուսումնական համակարգի մասին ըսելով որ Հայաստանի մէջ ուսանիլը անվճար է եւ այդպէսով, երիտասարդութեան հնարաւորութիւն տրուած է ձրիօրէն բարձր ուսում ստանալու: Ուրախութիւն յայտնեց որ ներկայիս հայաստանի երիտասարդութիւնը աւելի զարգացած եւ արթուն է եւ սկսած է իր բողոքի ձայնը բարձրացնել անարդարութիւններու դէմ: Ան, տեղեկացուց նաեւ որ ներկայիս աշխատանք կը տարուի յատուկ ուսումնական ծրագիր մը մշակելու՝ սփիռքահայերու ռազմական դաստիարակութեան համար: Ան բացատրեց նաեւ, որ ներկայիս բանակի ներքին ընկերային իրավիճակը մեծապէս բարելաւուած է:

Աւարտին եղան հարցումներ, որոնց բոլորին ալ համբերութեանբ, եւ մեծ սիրով պատասխանեց օրուայ հիւրը:

Վարժարանի թղթակից՝ Սալբի Թէքկէլեան

 

IMG_1272 (800x588) IMG_1274 (800x589) IMG_1275 (800x600) IMG_1276 (800x600) IMG_1277 (800x570) IMG_1278 (800x600) IMG_1279 (800x600) IMG_1280 (800x600) IMG_1281 (800x600) IMG_1282 (800x600) IMG_1283 (800x600)  IMG_1285 (800x600) IMG_1286 (800x600) IMG_1287 (800x588) IMG_1288 (800x600) IMG_1289 (800x600)

 

 

 

 

 

 

 

 

 

 

 

 

 

 

 

 

 

IMG_1271 (800x600) IMG_1270 (800x599)